بھاگ ملیکھا بھاگ.........Bhag Malikha Bhag....Film review

”بھاگ ملیکھا بھاگ “ لیجینڈ اتھلیٹ ملیکھا سنگھ کی حقیقی زندگی پر مبنی فلم ہے جسے تین گھنٹے کی فلم میں سمویا گیاہے۔ فلم میں اتھلیٹ ملیکھا سنگھ کی کہانی بچپن سے شروع کی گئی ہے جب وہ ہندو پاک کی علیحدگی کے دوران اپنے گھر والوں سے بچھڑ جاتا ہے جس کا زندگی میں کوئی مقصد نہیں ہوتا۔ جبکہ بیرو( سونم کپور ) سے پیار ہونے کے بعد اسے مقصد مل جاتا ہے تب وہ ایک عزت دار زندگی گزارنے کیلئے آرمی میں شامل ہو جاتا ہے۔ اس دوران وہ اتھلیٹ بن جاتا ہے اور 400 میٹر ریس میں حصہ لیتا ہے اور کیسے اپنے وطن کا نام روشن کرنے کیلئے جدوجہد کرتا ہے یہی فلم کی کہانی ہے۔

فلم میں فرحان اختر ملیکھا سنگھ کے روپ میں نظر آتے ہیں ۔ انہوں نے یہ کردار نبھانے سے پہلے پورے 18 مہینے ٹریننگ لی تھی۔ کی گئی محنت سے انہوں نے اپنے آپ کو مکمل طور پر اتھلیٹ ملیکھاسنگھ کے کردار میں ڈھالا ہے ۔ فلم میں فرحان اختر کی متاثر کن جسامت سے لے کر ان کی پرجوش اداکاری تک سب کچھ دیکھنے سے تعلق رکھتا ہے۔ یہ کہنا غلط نہیں ہو گا کہ فلم میں فرحان اختر کی اداکاری دیکھ کر حقیقی زندگی میں ملیکھا سنگھ کو ان پر فخر محسوس ہوگا۔ سونم کپور فلم میں بیرو کے کردار میں دیکھائی دیں گیں ، جو کہ ملیکھا کی محبت میں گرفتار ہے۔سونم کپور کی اینتری فلم شروع ہونے کے ایک گھنٹے بعد ہوتی ہے اور ان کا رول انتہائی مختصر ہے ۔ سونم گاوں کی چھوری کے کردار میں انتہائی معصوم اور خوبصورت نظر آئی ہیں۔

”بھاگ ملیکھا بھاگ “ کو ڈائریکٹ کیا ہے راکیش اوم پرکاش مہرا نے ۔ فلم میں بھاگنے ولے سین بہترین ہیں اور حقیقت سے قریب تر معلوم ہوتے ہیں۔ فلم کی موسیقی میوزک ڈائریکٹر سنکر کی جانب سے ترتیب دی گئی ہے۔ فلم کے گانے ”مسلوں کا جھنڈ “،انسپریشنل گانہ ”زندہ “ ،” میرا یار“ایک رومانوی گانہ ہے، جبکہ فلم کا بیک گراونڈ میوزک بھی انتہائی پرجوش ہیں۔

فلم میں ملیکھا بھاگتا تو بہت ہے لیکن فنش لائن تک پہنچتے پہنچتے تین گھنٹے نکل جاتے ہیں ، جی بالکل میں ہی کہنا چاہ رہی ہوں کہ فلم بہت لمبی ہے اور فلم کا پہلا حصہ بہت سست رفتاری سے آگے بڑھتا ہے۔فرحان اختر کا کہنا ہے کہ یہ ایک انٹرٹیننگ اور انسپائرنگ فلم ہے ۔ جی بالکل ان کا کہنا بالکل ٹھیک ہے ۔”بھاگ ملیکھا بھاگ “سے ہم بہت ساری انسپائریشن لے سکتے ہیں۔

 مجموعی طور پر اس فلم کو دیکھنے کی پانچ وجوہات بیان کی جا سکتی ہیں۔ پہلی وجہ فرحان اختر ہیں وہ اس لئے کہ ملیکھا سنگھ کے کردار کو پردے پر اتارنے کیلئے انہوں نے جو محنت کی یہ وہ دیکھنے سے تعلق رکھتی ہے۔ دوسری وجہ فلم کے ڈائریکٹر راکیس اوم پرکاش کی ڈائریکشن ہے۔ کیونکہ ان کی یہ فلم ان کی گزشتہ فلم ”رنگ دے بسنتی “کے چار سال کے بعد آئی ہے۔ ان کی گزشتہ فلم کا جادو اب تک لوگوں کے ذہنوں سے نہیں اترا اسی لئے اب ان کی ان فلم کا انتظار بے چینی سے کر رہے تھے۔ اتھلیٹ ملیکھا سنگھ کی حقیقی زندگی کی دلچسپ کہانی اس فلم کو دیکھنے کی تیسری وجہ ہے جبکہ فرحان اور سونم کی جوڑی فلم دیکھنے کی چوتھی وجہ ہے۔ پانجویں وجہ اس فلم کی جاندار موسیقی ہے۔ اب اتنی وجوہات کے باوجود بھی یہ فلم نہ دیکھی جائے تو اس فلم کے ساتھ زیادتی ہی ہوگی۔

اس فلم کے بارے میں بالی وڈ کے کنگ خان ”شاہ رخ “خان کا کہنا ہے کہ فلم دیکھنے کے بعد انہوں نے فلم کی کامیابی پر ڈائریکٹر راکیش کو فون کر کے مبارکباد پیش کی اور فرحان اختر سے کہا کہ فلم دیکھنے کہ بعد وہ ان سے بے حد متاثر ہوئے ہیں۔