”عشق ان پیرس “۔۔۔ ری ویو.......Bollywood Movie.....Ishq In Paris

”عشق ان پیرس “یقینی طور پر ایک محبت کی کہانی ہے، جس میں پریتی اور ریحان ملک مرکزی کردار ادا کر رہئے ہیں ، پریم راج کی ڈائریکشن میں بنی اس فلم کی موسیقی میوزک ڈائریکٹر ز ساجد واجد نے ترتیب دی ہے۔ پیرس کی گلیوں میں بنی اس فلم کو تنقیدی نظر سے تولا جائے تولگتا ہے کہ پریتی اس فلم کو اپنا ”کم بیک “بنانا چاہتی تھیں کیو نکہ وہ خود نہ صرف اس فلم کی پروڈیوسر ہیںبلکہ کہانی کا تمام فوکس بھی انہی کے مرکزی کردار پر ہے۔ اس کے ساتھ ساتھ فلم کی کہانی لکھنے میں بھی پریتی نے کردار ادا کیا ہے، البتہ پریتی اور فلم کے ڈائریکٹر اس کوشش میں پوری طرح سے کامیاب نہیں ہو سکے، فلم کی ریلیز اور ابھی تک باکس آفس پر بزنس نے ثابت کر دیا ہے کہ فلم پریتی کے دم توڑتے سٹار ڈم کی سانسیں بحال کرنے میں زیادہ مددنہ کر پائے گی۔ پریتی زنٹا آخری مرتبہ 2008 ءمیں فلم ”ہیروز “میں جلوہ ر ہوئی تھیں ۔

فلم”عشق ان پیرس “ میں پریتی عشق کا کردار ادا کرتی نظر آئیں۔ عشق ایک بھارتی نژاد فرنچ نوجوان لڑکی ہے، جو کہ انتہائی شرمیلی ، حساس اور کبھی نفسیاتی مریضہ کی طرح برتاو کرتی ہے ،باپ کی محبت سے محروم عشق اور اس کی فرنچ ماں ایزابیل ایڈجانی ہی ایک دوسرے کا کل اثاثہ ہیں ، عشق کے والد کا کردار شیکھر کپور نے ادا کیا جو اس کی ماں ایزابیل ایڈجانی اور اسے اکیلا چھوڑ کر چلا جاتا ہے، عشق کی ماں نے اسے بہت توجہ اور لاڈ پیار سے پالا ، تاہم اس کی شخصیت میں باپ کی عدم موجودگی کے سبب ایک نہ ختم ہونے والا خلا پیدا کر دیا۔

فلم میں پریتی لندن سے آئے ایک لڑکے آکاش سے ملتی ہے ، جو پورا دن ساتھ گزارتے ہیں ، پیرس کی گلیو ں کوچوں اور بازواروں میں گھومتے ہیںاور الگ ہو جاتے ہیں ، ایک دوسرے کو خدا حافظ کہنے کے بعد آکاش اپنے شہر لندن چلا جاتا ہے اور اپنے کام میں لگ جاتا ہے ، لیکن عشق سے دور ہو کر اسے عشق کی محبت میں گرفتار ہونے کا احساس ہوتا ہے، جس پر وہ فوری طور پر عشق سے ایک سماجی ویب سائٹ کے ذریعے رابطہ کرتا ہے۔ اسی عرصہ میں آکاش اپنے ایک دوست کی شادی میں شرکت کے سلسلے میں پیرس آتا ہے ، پیرس آ کر آکاش کو عشق سے ملنے اور اپنی دوستی آگے بڑھانے کیلئے بہترین موقع ملتا ہے جس کا وہ بھرپور طریقے سے فائدہ اٹھاتا ہے اور عشق سے اپنی محبت کا اظہار کرتا ہے ۔ یہاں کہانی میں ایک موڑ آتا ہے جب عشق آکاش کی محبت قبول کرنے سے انکار کر دیتی ہے اور اسے اپنے راستے جانے کا کہتی ہے، اس موقع پر عشق کی ماں ایزابیل ایڈجانی اپنا کردار ادا کرتی ہیں اور آکاش کی محبت قبول کرنے کیلئے عشق کو رضا مند کر لیتی ہیں، جس کے بعد عشق اور آکاش کی محبت کی خوشگوار شروعات کے ساتھ فلم اختتام پذیر ہوجاتی ہے۔ فلم کے اختتام پر عشق کیلئے ایک اور خوشگوار لمحہ آتا ہے جب عرصے سے بچھڑے اس کے والد شیکھر کپور اس سے ملتے ہیں ، اس کی ماں ایزابیل ایڈجانی اپنے شوہر کا استقبال شلوار قمیض اور چوڑیاں پہن کر کرتی ہے، جس کے بعد عشق اور اس کی ماں ایزابیل ایڈجانی کی زندگی خوشگوار ہو جاتی ہے۔

کہانی میں انگریزی اثر پیدا کرنے میں آکاش کا کردار نبھانے والے ”ریحان ملک “کا حاصا حصہ ہے ۔ عمدہ اداکاری کے ذریعے ریحان نے اپنے کردار کے تقاضے بخوبی نبھائے ہیں۔ پریتی زنٹا البتہ اسی طرح کے ملتے جلتے کردار یورپی ممالک کی لوکیشنز پر پہلے بھی کر چکی ہیں۔ ان کے کردار میں کبھی بھی نیا اور فلم بینوں کیلئے دلچسپی کا سبب دکھائی نہیں دیتا ۔ دوسری جانب آسکر نامزد فرنچ اداکارہ ازابیل کو پریتی کی ماں کے روپ میں دکھانا بھی کچھ درست سلیکشن ثابت نہیں ہوا۔ بالخصوص فرنچ خاتون پر ہندی زبان کی ڈبنگ تو خاصی نامعقول محسوس ہوتی رہی۔ میوزک کے حوالے سے بھی ”عشق ان پیرس “کوئی یادگار نشان نہیں چھوڑ سکی۔ لہذا یہ فلم غالبا سنیما جا کر دیکھنے کی بجائے سی ڈی پر دیکھ لینا ہی بہتر ہو گاتاکہ آپ کوپیسوں کے ضیاع کا افسوس نہ ہو۔